រដ្ឋបាលជលផលខេត្តកណ្ដាល ចាប់បានរថយន្ត ១គ្រឿង ដឹកបង្កងខុសច្បាប់ ទម្ងន់ជិត ១តោន ដែលនាំចូលមកពីក្រៅប្រទេស ពុំមានលិខិតបញ្ជាក់អំពីគុណភាពនាំចូលច្បាស់លាស់ ។
ប្រតិបត្តិការនេះ បានធ្វើឡើង កាលពីយប់រំលងអធ្រាត្រ ថ្ងៃទី៤ ខែកញ្ញា ឆ្នាំ២០២៤ នៅស្រុកកៀនស្វាយ ខេត្តកណ្តាល ។
តាមការបញ្ជាក់ពី លោក ហេង សុភារិទ្ធ នាយខណ្ឌរដ្ឋបាលជលផលកណ្ដាល បានឱ្យដឹងនៅថ្ងៃទី៧ ខែកញ្ញា ឆ្នាំ២០២៤ នេះថា លោក គួច ចំរើន អភិបាលខេត្តកណ្តាល បានបញ្ជាឱ្យលោកចុះដឹកនាំមន្ត្រីក្រោមឱវាទ សហការជាមួយកម្លាំងអាវុធហត្ថ ធ្វើការឃាត់រថយន្ត ១គ្រឿង ដែលមានពាក់ផ្លាកលេខ ភ្នំពេញ 3G-5776 ដឹកបង្កងខុសច្បាប់ចំនួន ២៦ធុង ស្មើនឹងទម្ងន់ជិត ១តោន ។
លោក ហេង សុភារិទ្ធ បន្តថា ចំពោះការឃាត់នេះដែរ មកពីម្ចាស់រថយន្តមិនព្រមសហការគ្នាជាមួយសមត្ថកិច្ច ដោយកន្លងមក មន្ត្រីជំនាញ ក៏ធ្លាប់បានធ្វើការណែនាំច្រើនសារមកហើយ ប៉ុន្តែម្ចាស់បង្កង និងម្ចាស់រថយន្ត នៅតែរឹងទទឹង និងហ៊ានប្រមាថទៅលើមន្ត្រីជាច្រើនលើកទៀតផង ។
គួរឱ្យដឹងដែរថា ចំពោះបង្កងដែលរឹបអូសបានមានទម្ងន់ជិត ១ តោននេះ បានងាប់ស្អុយរលួយអស់ គឺត្រូវសម្រេចកប់ចោលតែម្ដង ៕
