ខ្យល់កន្ត្រាក់បោកផ្តួលផ្លាកប៉ាន់ណូផ្សាររាត្រី បាក់រលំសង្កត់រថយន្តទំនើប ១គ្រឿង នៅក្រុងបាវិត តែមិនបង្កឱ្យមានអ្នករងរបួសនោះទេ

(ស្វាយរៀង) ៖ ភ្លៀងផ្គរលាយឡំខ្យល់កន្ត្រាក់ បាក់រលំប៉ាន់ណូសង្កត់ពីលើរថយន្តទំនើប ១គ្រឿង ជាប់ពីលើ ខណៈរថយន្តបើកបរចេញពីផ្សាររាត្រី បង្កឱ្យអ្នកនៅក្នុងរថយន្តភ័យស្លន់ស្លោរបើកទ្វារថយន្តរត់ចេញទៅក្រៅ ។

ករណីនេះ បានកើតឡើង កាលពីវេលាម៉ោង ០៤ ៖ ១០ នាទីរសៀល ថ្ងៃទី១៦ ខែឧសភា ឆ្នាំ២០២៤ នៅខាងមុខផ្សារតាត្រី ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ។

បើតាមសមត្ថកិច្ច បានឱ្យដឹងថា នៅមុនពេលកើតហេតុ ផ្ទៃមេឃមានពពកខ្មៅលាយឡំផ្គររន្ទះ និងខ្យល់បោកបក់ខ្លាំងៗហុយដី ហើយគេឃើញមានរថយន្តទំនើប ០១ គ្រឿង ម៉ាកអាល់ហ្វាត ពណ៌ស ពាក់ផ្លាកលេខ ភ្នំពេញ 2CA-3966 បើកបរដឹកភ្ញៀវចេញពីផ្សាររាត្រី ។

ប្រភពខាងលើ បានបន្តទៀតថា លុះមកដល់ចំណុចកើតហេតុខាងលើនោះ ស្រាប់តែប៉ាន់ណូផ្លាកយីហោ ផ្សាររាត្រីក្រុងបាវិត បាក់ដួលរលំមកសង្កត់ចំពីលើដំបូលថយន្តតែម្តង បង្កឱ្យអ្នកធ្វើដំណើរក្នុងរថយន្តមានការភ័យខ្លាច នាំគ្នារត់រកកន្លែងមានសុវត្ថិភាព ខណៈភ្លៀងផ្គរខ្យល់កន្ត្រាក់យ៉ាងខ្លាំង បក់បោកគ្របមកលើក្រុងបាវិតទាំងមូល ហើយនៅតាមដងផ្លូវជាតិលេខ១ ក៏មានដួលរលំប៉ាន់ណូជាច្រើនផងដែរ ៕