(បាត់ដំបង) ៖ នៅថ្ងៃទី៧ ខែមីនា ឆ្នាំ២០២៤ វេលាម៉ោង ១៣ ៖ ៣០ នាទី នៅចំណុចចម្ការក្រុមហ៊ុនអាមេរិចកាំង (ភ្នំស្រង់តូច) ស្ថិតក្នុងភូមិស្វាយស ឃុំត្រែង ស្រុករតនមណ្ឌល ខេត្តបាត់ដំបង មានករណីផ្ទុះគ្រាប់មីនតោន បណ្តាលឱ្យមនុស្សម្នាក់ រងរបួសស្រាល ។
លោកវរសេនីយ៍ឯក សន និល អធិការនគរបាលស្រុករតនមណ្ឌល បានឱ្យដឹងថា ជនរងគ្រោះឈ្មោះ ខាន់ រិទ្ធី ភេទប្រុស អាយុ ៣២ ឆ្នាំ រស់នៅភូមិស្វាយស ឃុំត្រែង ស្រុករតនមណ្ឌល ខេត្តបាត់ដំបង ។
យោងតាមសមត្ថកិច្ច បានឱ្យដឹងថា ជនរងគ្រោះបានបើកត្រាក់ទ័រទៅស៊ីឈ្នួលភ្ជួរដីឱ្យក្រុមហ៊ុនអាមេរិចកាំង នៅចំណុចខាងលើ ក៏បណ្ដាលឱ្យភ្ជួរប៉ះចំមីនតោន បណ្ដាលឱ្យផ្ទុះ រងរបួសស្រាល ។
ក្រោយទទួលដំណឹង កម្លាំងអធិការដ្ឋាននគរបាលស្រុករតនមណ្ឌល បានចុះធ្វើការត្រួតពិនិត្យ និងដឹកបញ្ជូនជនរងគ្រោះទៅមន្ទីរពេទ្យ ដើម្បីសម្រាកព្យាបាល ៕
