(ភ្នំពេញ) ៖ កម្លាំងគណៈបញ្ជាការឯកភាពខណ្ឌទួលគោក ដឹកនាំដោយ លោក ស៊ឹប សុផង់ និងលោក ឈាង វុទ្ធី អភិបាលរងខណ្ឌ បានចុះរដ្ឋបាលរុះរើ និងដកហូតរាល់សម្ភារទាំងឡាយដែលមានការដាក់លក់ដូរនៅលើចិញ្ចើមផ្លូវសងខាងជាប់របងមន្ទីរពេទ្យកុមារជាតិ ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ នៅព្រឹកថ្ងៃទី២២ ខែធ្នូ ឆ្នាំ២០២៣។
លោក ស៊ឹប សុផង់ អភិបាលរងខណ្ឌទួលគោក ទទួលបន្ទុកសណ្តាប់ធ្នាប់សាធារណៈ បានឱ្យដឹងថា ការចុះអនុវត្តនៅថ្ងៃនេះ បន្ទាប់ពីចប់ឱសានវាទ សម្រាប់ការមិនបន្តអនុញ្ញាតឱ្យមានការយកចិញ្ចើមផ្លូវនៅចំណុចខាងលើធ្វើជាអាជីវកម្មផ្ទាល់ខ្លួនទៀតនោះទេ។ កាលពីពេលកន្លងទៅ រដ្ឋបាលខណ្ឌតែងបានចុះណែនាំជាច្រើនលើកច្រើនសារ មុនឈានដល់ការមានវិធានការរដ្ឋបាលនេះ ។
សូមបញ្ជាក់ថា អាជ្ញាធរខណ្ឌទួលគោក តែងបានចុះជាប្រចាំ និងជាដំណាក់កាលៗ នៅក្នុងភូមិសាស្ត្រខ្លួន ចំពោះវិធានការរដ្ឋបាល តាមទីតាំងចំណី ឬចិញ្ចើមផ្លូវសាធារណៈទាំងឡាយណា ដែលមានការរំលោភបំពានពីសំណាក់ពលរដ្ឋយកប្រើប្រាស់ជាការលក់ដូរអាជីវកម្មសម្រាប់តែការបំពេញផលចំណេញផ្ទាល់ខ្លួន ប៉ុន្តែធ្វើឱ្យបាត់បង់របៀបរៀបរយ និងសណ្តាប់ធ្នាប់សាធារណទៅវិញ៕
