(ស្វាយរៀង) ៖ ភ្លៀងមួយមេធំ លាយឡំខ្យល់កន្ត្រាក់ បង្កឱ្យរលំអគាររោងចក្រ ចំនួន ០២ខ្នងរាបដល់ដី បណ្តាលឱ្យកម្មករសំណង់ ០៤ នាក់ រងរបួសធ្ងន់ ហើយត្រូវបានបញ្ជូនទៅមន្ទីរពេទ្យខេត្តស្វាយរៀង និង ០៣ នាក់ផ្សេងទៀត រងរបួសស្រាល បញ្ជូនទៅមន្ទីរពេទ្យបង្អែកជីភូ ដើម្បីព្យាបាល ។
ហេតុការណ៍នេះ បានកើតឡើង នៅវេលាម៉ោង ៧ ៖ ៣០ នាទីយប់ ថ្ងៃទី១៣ ខែឧសភា ឆ្នាំ២០២៤ ស្ថិតនៅក្នុងភូមិព្រៃគគីរ ឃុំព្រៃគគីរ ស្រុកចន្ទ្រា ខេត្តស្វាយរៀង ។
បើតាមអាជ្ញាធរស្រុកចន្ទ្រា បានឱ្យដឹងថា មានភ្លៀងមួយមេធំ លាយឡំខ្យល់កន្ត្រាក់យ៉ាងខ្លាំង បណ្តាលឱ្យគ្រោងដែកសាងសង់អាគាររោងចក្រ ០២ ខ្នង (ទទឹង ៨១ម៉ែត្រ បណ្ដោយ ១៦២ម៉ែត្រ) កំពុងតែសាងសង់ថ្មី ដួលរលំខូចខាតទាំងស្រុង ស្ថិតក្នុងតំបន់សេដ្ឋកិច្ចពិសេសតាយសេងបាវិត ដែលមានកម្មករសំណង់នៅទីនោះរងរបួស ចំនួន ០៧ នាក់ ក្នុងនោះរបួសធ្ងន់ ០៤ នាក់ (បាក់ដៃ ២នាក់ របួសបែកក្បាល ២នាក់) និងរបួសស្រាល ០៣ នាក់ ។
ចំពោះអគាររោងចក្រដែលកំពុងសាងសង់ថ្មីខូចខាតទាំងស្រុង ជាមួយនេះ ក៏មានខូចខាតរថយន្តក្រឡុកស៊ីម៉ង់ត៍ ០៣ គ្រឿង ខូចខាតរថយន្តបាញ់បេតុង ០១ គ្រឿង ខូចខាតរថយន្តម៉ាកតាកូម៉ា ០១ គ្រឿង និងរ៉ូឡូកិនដី ០១ គ្រឿង ហើយករណីនេះដែរ ពុំមានរងគ្រោះដល់អាយុជីវិតមនុស្សនោះទេ ៕
