ផ្សាយចេញពី៖ ក្រុងបាត់ដំបង ថ្ងៃទី២៤ ខែកុម្ភៈ ឆ្នាំ២០២៤ | គេហទំព័រ សាយ ប៉ូច ហតញូស៍ Say Pouch Hot News | ទំនាក់ទំនង 012 732 712 / 098 2 732 712
(ភ្នំពេញ) ៖ រថយន្តដឹកឥដ្ឋ ០១ គ្រឿង ពាក់ផ្លាកលេខ កំពង់ធំ 3A-0688 បើកលឿនដូចហោះ បុករះចូលផ្ទះជាងជួសជុលម៉ូតូមួយកន្លែង ស្ថិតនៅផ្លូវបំបែកជាបួន ភូមិទ្រា១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ កាលពីវេលាម៉ោង ០១ ៖ ១៥ នាទីរសៀល ថ្ងៃទី២៣ ខែកុម្ភៈ ឆ្នាំ២០២៤ ។
ហេតុការណ៍នេះ បណ្តាលឱ្យក្មេងស្រីសិស្សសាលាម្នាក់ រងរបួសធ្ងន់ ចំណែកអ្នកដំណើរ ០៣ នាក់ផ្សេងទៀត រងរបួសស្រាល ។ ចំពោះអ្នកបើកបររថយន្តបង្ក និងព្រូរថយន្ត ០២ នាក់ទៀត បានបើកទ្វាររថយន្តចុះរត់គេចខ្លួនបាត់ស្រមោលតែម្តង ។
យោងតាមប្រភពព័ត៌មាននៅកន្លែងកើតហេតុ បានឱ្យដឹងថា មុនពេលកើតហេតុ គេឃើញមានអ្នកដំណើរជាច្រើនាក់រួមនឹងជនរងគ្រោះខាងលើ បានធ្វើដំណើរឆ្លងកាត់ចំណុចផ្លូវបំបែកជាបួន ផ្លូវ៣៧១ សឡា ស្របពេលនោះក៏មានរថយន្តដឹកឥដ្ឋខាងលើ បើកបរដោយបុរសម្នាក់ រួមនឹងព្រូចំនួន ០២ រនាក់ទៀត ក្នុងទិសដៅពីលិចទៅកើត លុះដល់ផ្លូវបំបែកជាបួន អ្នកបើកបរមិនបានបង្អង់ល្បឿនរថយន្តនោះទេ បានបុករះអ្នកដំណើរដែលឆ្លងកាត់ចំណុចផ្លូវបំបែកជាបួន ហើយជ្រុលទៅបុកចូលក្នុងផ្ទះជាងជួសជុលម៉ូតូ បណ្តាលមានអ្នករងរបួសធ្ងន់ និងស្រាល ០៤ នាក់ ចំណែកម៉ូតូ ០២ គ្រឿង រងការខូចខាងយ៉ាងដំណំ ។
ក្រោយពេលកើតហេតុ សមត្ថកិច្ចបានបញ្ជូនជនរងគ្រោះទៅកាន់មន្ទីរពេទ្យ ចំណែករថយន្តបង្ក និងម៉ូតូជនរងគ្រោះ យកទៅរក្សាទុកដើម្បីដោះស្រាយគ្នាតាមផ្លូវច្បាប់នៅពេលក្រោយ៕
