(បាត់ដំបង) ៖ ទីតាំងប្រព្រឹត្តបទល្មើសនេសាទ ចំនួន ០៤ កន្លែង ដែលស្ថិតក្នុងតំបន់ «អតីតដែនឡូត៍នេសាទលេខ១» ត្រូវបានមន្ត្រីកម្លាំងជលផល ដែលមានកិច្ចសហការពីកម្លាំងសមត្ថកិច្ចមូលដ្ឋានផង ចុះទៅកាប់កម្ទេចចោល កាលពីថ្ងៃទី២៧ ខែមករា ឆ្នាំ២០២៤ ស្ថិតក្នុងភូមិសាស្ត្រឃុំកោះជីវាំង ស្រុកឯកភ្នំ ខេត្តបាត់ដំបង ។
កម្លាំងចុះបង្ក្រាប បានឱ្យដឹងថា កម្លាំងចម្រុះរបស់ស្រុកឯកភ្នំ ដែលដឹកនាំដោយមន្ត្រីជលផល បានចុះទៅកាន់តំបន់ «អតីតដែនឡូត៍នេសាទលេខ១» ដោយបានកាប់បំផ្លាញឧបករណ៍នេសាទខុសច្បាប់ ចំនួន ០៤ ទីតាំង ។
ប្រភពដដែល បានឱ្យដឹងទៀតថា លទ្ធផលនៃកិច្ចប្រតិបត្តិការនោះ កម្លាំងចម្រុះបានកាប់បំផ្លាញចោលរួមមាន៖ សាច់ស្បៃមង ប្រវែង ២.៣០០ ម៉ែត្រ បង្គោលឈើជាង ៨០០ ដើម ឡុកចាប់ត្រី ចំនួន ០៩ និងព្រលែងកូនត្រីជាច្រើនគីឡូក្រាមចូលទឹកវិញ តែមុខសញ្ញាជនប្រព្រឹត្ត សមត្ថកិច្ចហាក់មិនទាន់ស្គាល់អត្តសញ្ញាណនៅឡើយទេ ។
មានការកត់សម្គាល់ដែរថា កម្លាំងសមត្ថកិច្ចចម្រុះ បានចុះទៅប្រចាំការនៅតំបន់ទន្លេសាបតែម្ដង ដើម្បីបង្ក្រាបបទល្មើសនេសាទ ។ ប៉ុន្មានខែកន្លងទៅនេះ កម្លាំងសមត្ថកិច្ចចម្រុះ តែងចុះបង្ក្រាបបទល្មើសនេះស្ទើររាល់ថ្ងៃ កាប់បំផ្លាញចៅលនូវឧបរកណ៍នេសាទល្មើសច្បាប់នេះ រាប់ពាន់ម៉ែត្រ តែគេមិនធ្លាប់ចាប់បានជនប្រព្រឹត្តបទល្មើសនេះ បានម្នាក់ទេ ។
បើទោះជាកិច្ចប្រតិបត្តិការនេះ ធ្វើដូចភ្លៀងរលឹមក្ដី តែជនល្មើសកាន់តែបង្កើនសកម្មភាពប្រព្រឹត្តបទល្មើសទ្វេដង ហាក់ផ្គើននឹងកម្លាំងសមត្ថកិច្ចណាស់ ។ នេះដោយសារតែ ពួកជនទុច្ចរិតប្រព្រឹត្តល្មើសទាំងនោះ មិនត្រូវបានចាប់ខ្លួន ស្ថិតនៅក្រៅសំណាញ់ច្បាប់ ទើបពួកគេមានសេរីភាពប្រព្រឹត្តបទល្មើសតាមទំនើងចិត្ត បង្ក្រាបមិនចេះថមថយបែបនេះ ៕
