សមត្ថកិច្ចឃាត់ខ្លួនក្រុមក្មេងទំនើងឈ្មោះ K.V ប្រចាំស្រុកគៀនស្វាយ ខេត្តកណ្តាល ចំនួន ៩នាក់ ដែលបង្កហិង្សានៅភូមិសាស្ត្រខេត្តកណ្តាល រួចគេចមកលាក់ខ្លួននៅបុរីកីឡា

(ភ្នំពេញ) ៖ កម្លាំងសមត្ថកិច្ច នៃអធិការដ្ឋាននគរបាលខណ្ឌ៧មករា ដឹកនាំដោយលោកវរសេនីយ៍ទោ ជុន ប៊ុនណាន អធិការនគរបាលខណ្ឌ៧មករា បានចុះធ្វើរដ្ឋបាលនៅជុំវិញបុរីកីឡា ជាមួយនឹងគណៈបញ្ជាការឯកភាពខណ្ឌ៧មករា និងបានធ្វើការឃាត់ខ្លួនក្រុមក្មេងទំនើង ចំនួន ០៩នាក់ យកមកអធិការនគរបាលខណ្ឌ៧មករា ដើម្បីធ្វើការសាកសួរ ។

ដោយអនុវត្តតាមបទបញ្ជារបស់ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងសមត្ថកិច្ចខណ្ឌ៧មករា បានធ្វើការចុះពិនិត្យរដ្ឋបាលនៅជុំវិញបុរីកីឡា ដោយបានធ្វើការឆែកឆេរ ក៏បានប្រទះឃើញក្រុមក្មេងទំនើង ចំនួន ០៩នាក់ ដែលបានជួលបន្ទប់ស្នាក់នៅ ក៏បានធ្វើការឃាត់ខ្លួនក្រុមក្មេងទំនើងទាំងនោះ យកមកសាកសួរនៅអធិការនគរបាលខណ្ឌ៧មករា ។

ក្រោយពីធ្វើការឃាត់ខ្លួនក្រុមក្មេងទំនើង ចំនួន ០៩នាក់ខាងលើរួចមក សមត្ថកិច្ចជំនាញក៏បានធ្វើការសាកសួរក្រុមក្មេងទំនើងទាំងអស់នោះ ពួកគេក៏បានឆ្លើយសារភាពថា នៅក្នុងអំឡុងពេលចូលឆ្នាំខ្មែរ (មិនចាំថ្ងៃខែ) ក្រុមនេះ ត្រូវបានក្រុមក្មេងទំនើងមួយក្រុមទៀតនៅអ្នកលឿង ធ្វើការដេញកាប់ និងកាប់បំផ្លេចបំផ្លាញទ្រព្យសម្បត្តិរបស់ពួកគេ ។

ក្រោយពេលកើតុហេតុរួចមក ក្រុមក្មេងទំនើងមានឈ្មោះ (K.V) បានប្រាប់បន្តថា នៅក្នុងអំឡុងខែមេសាដដែល (មិនចាំថ្ងៃខែ) ក្រុមរបស់ខ្លួនបាននាំគ្នាទៅសងសឹកវិញ ដោយបានដេញកាប់ក្រុមអ្នកលឿង និងកាប់បំផ្លាញទ្រព្យសម្បត្តិរបស់ក្រុមអ្នកលឿងវិញម្តង ។ ក្រោយពីធ្វើការកាប់បំផ្លាញទ្រព្យសម្បត្តិរួចមក ក្រុមខ្លួនមានការបារម្ភភ័យខ្លាចក៏បាននាំគ្នារត់មកជួលបន្ទប់ស្នាក់នៅជាក្រុមក្នុងបុរីកីឡា ក្នុងសង្កាត់វាលវង់ ខណ្ឌ៧មករា ដើម្បីគេចខ្លួនពីក្រុមក្មេងទំនើងអ្នកលឿង ។

ក្រោយពីធ្វើការសួរនាំក្រុមក្មេងទំនើង (K.V) រួចមក សមត្ថកិច្ចជំនាញក៏បានធ្វើតេស្តរកសារធាតុញៀន ក៏បានរកឃើញថា ក្រុមក្មេងទំនើង ចំនួន ០៦នាក់ បានប្រើប្រាស់នូវសារធាតុញៀន ។

បច្ចុប្បន្ន ក្រុមក្មេងទំនើងទាំង ០៩នាក់ខាងលើ ត្រូវបានសមត្ថកិច្ច នៃអធិការនគរបាលខណ្ឌ៧មករា ធ្វើការប្រគល់ជូនទៅសមត្ថកិច្ច នៃស្នងការនគរបាលខេត្តកណ្ដាល ដើម្បីបន្តនីតិវិធីច្បាប់ ៕